هجالة
وماشية في البلد تسأل
انا اللي جوزي مهوش موجود
وكل حاجة اعملها
الناس تقولي غلط
من قلة الرجالة ؟؟
ما هو اي بيت يتبني
بيتصبله عمدان
وانا اللي بيتي يا خلق
مفهوش اي عامود
من بعد جوزي مارحل
حالتي بقت حاله
انا بس ذنبي أيه
ماتعرفيني يا خالة
أمد أيدي لناس
ولا أموت م الجوع
وصغاري على كتفي
مكلوش يجي من اسبوع
وما تغيري الموضوع
عارفة البلد دي صغيرة
وارخص مافيها الناس
ومابيدي أنا حيله
والناس بلا إحساس
ماطلبت غير الستر
من رب كل الناس
