علو الآذان دقوا الجرس
وعلو صوتكو اللي انخرس
خالــــــــد شهيـد
أوعوا تخافوا من الحرس
لا يبقى حيوان مفترس
وطمعـــــــــه يزيد
لحد امتى يا بلد كل
اللي جاي منك بنات
ومفيش ولد
يقبل عشانك يتسجن
أو حتى انه يتجلد
زى اللي مات
راضيين بكل الابتزاز وبيوت قزاز
هتنكسر مع أول طوبة أو جرس
علوا الرؤؤس فوق الكتاف
ماعاشي واحد لما خاف
لكنه مات
وزير وظابط مع موظف مرتشي
فين الكبير اللي يقول عيب اختشي
دكتور وباع مهنته علشان مزاجه
نفس الغلط برضه المدرس جه وعاده
وإحنا الأهالي بنتخرس
نبكي الدموع على اللي راح وننكسر
نقبل نطاطي ونقول يا رب ننتصر
وعمره ما هيجي انتصار
والوقت فات
العيب راكبنا من ساسنا لحد رأسنا
قابلين باي حد يجي وبرجله يدوسنا
مع أننا نقدر نفوق
ونبقى فوق
كل الأمم
شدو الهمم
وسيبوا بركان الغضب
يرمي الحمم
يمكن تحرق اللي فينا سنين ظلم
يمكن يجينا في يوم واحد محترم
يا خلق فوقوا بقى
ده حسني هيبيع الهرم
بقلم الشاعر عيد مصطفى
مصري الجنسية عربي الهوية، احب أن أضع كل ما كتبت من أشعار وقصائد ومقالات وكتب ولاأبخل به عليكم، وخطرت لي فكرة عمل مدونة تضم كل كتاباتي ومواضيعي الشعرية وإفادتكم بها، فأرجوا ان لاتبخلوا علي أيضا بمتابعتكم لمواضيعي كما ان تعليقاتكم تهمني وتزيد من عطائي لكم إخوتي الكرام وأي استفسار ان موجود وشكرا
0 التعليقات:
إضغط هنا لإضافة تعليق
إرسال تعليق
Blogger Widgets