خلاص وداع يا فيس بوك ملاقتش فيك غيرلوك لووك

خلاص وداع يا فيس بوك
ملاقتش فيك غيرلوك لووك
ضيعتي عمري معاك 
أحسن لي اشتري توكتوك

وكل واحد فيك

 عاملي نجم الجيل 
وكل واحد جاي

 وفاكرني راكب فيل

بقى كله بيغني

 وبقى كله بيسايس 
وكل واحد عمل

 جروب وفيه هايص

مبروك عليك يا فيسفوس

 خليت شبابنا يفيص
صاحبت فيك ملايين

 ملاقيتش حد كويس

خلاص وداع يا فيس بوك

 يا قهوة المعاشات
أنا شب لسه

لكن طموحي أهو مات

اقعد عليك واشتكي

واقول مفيش اشغال 
وامتى انا هتجوز

 وامتى اربي عيال

بقى كله فيك بيعك

عمال على البطال 
لا حد فاهم حاجة

 والحال اخر جمال

لو بكرة رايح فرح

 اشدلي نفسين 
اعمل ايفنت صغير

 مع نجم الحشاشين
وابعت رسالة ف ثانية مني

 لكل الناس

 تعالوا شاركوني

 ف مهرجان الأنفاس
خلاص وداع يا فيسبوك

 يا مضيع الأجيال
كثر الكلام حواليك

والضرب بالأمثال

إقرأ المزيـــد

بتتقلي ولا يهمك

بتتقلي ولا يهمك
مش هتسألي ولا يهمك
هوة أنتي فاكرة أنك يا شاطرة
هتشغليني وتعلقيني من نظرة واحدة
ولا يهمك

بصي بقى هنا واسمعي
عن اللي في دماغك ارجعي
وبلاش كده ليه معقده
وقو ليلي ايه عكر دمك
تسكتي ولا يهمك
وتكروتي ولا يهمك

عايش الحياة دي بكل بساطة
وبلاش تنصي لفوق بالاطة
م كلنا ولاد سبعه وتسعة
ولا اشتكيتك لحظة لأمك

بس برضه ولا يهمك
أنا قولت اسيبك في المقلب
خلي للي ف دماغك يلعب
بكرة الشيطان اللي ماليكي
من كره فيا أنا رح يتعب
وترجعي وأنتي بنفسك
يكون مناكي اونفسك
تشوفيني مرة او كل مرة
وتقولي حبي جري ف دمك

وبس برضه ولا يهمك

إقرأ المزيـــد

انا مسافر وهرمي كله ورا ظهري

انا مسافر وهرمي كله ورا ظهري
انا مسافر وهنسى حزني أو قهري
ومش باقي على حاجة ويلاش بحبي تتظاهري

انا عندي 100 مليون سبب علشان اسيبك
أولها أني مش الوحيـد اللي حبيبك
وان الحكاية متستاهلش أكون معاك
أحسن لقلبي أني يبعد عن هواك
وأكون مجرد قلب دوسته أنتا ف طريقك


انا مسافر هبدء حياتي ف حته ثانية وجو تاني
مش هفتكر من ماضينا ولو ثواني
جايز أقابل حد يعرف قد إيه معنى الوفا
وألاقي في الغربة المراد وحب تاني

انا مسافر وهرمي كله ورا ظهري
انا مسافر وهنسى حزني او قهري
ومش باقي على حاجة بلاش للحب تتظاهري

إقرأ المزيـــد

دنا شاب أمور ومدردح

أنا مترفضتش يا حماتي ولا حد يقولي لأ
إيه يعني شب فقير وايه يعني معنديش شقة
كل الشباب زيي الكل محتاج زقة
إيه يعني بفطر فول واتغدى كشري بدقة
بحلم في شغلي كمان اكبر يا ناس وأترقى
ومن بعد الغنا همثل واتشهر زى السقا
يعني تعامليني كويس وتكلميني برقة

ياااااااااااااا حمااااااااااااااااتي

دنا شاب أمور ومدردح ومليش ف الحركات
ومدقدق قوى قوى ومفتح وصحابي فتوات

بودي جارد وعربية شيروكي ومكاتب شركات
مع أسهم ف البورصة بتعلى والمكسب دولارات

أنا بطلت أوقف شعري واعمل فيه تقاليع
أنا دلوقتي بضبط نفسي في حكاية المشاريع

ولا جه ف بالي اصاحب واحدة و لا اشوف حتى بنات
مع أني أمور ومدردح وصحابي فتوات


ليه يا حماتي كسرتي بخاطري وقولتيلي متنفعش
قولتي الشبكة أنا جبت الشبكة وحلفتي مترجعش
كنتي حبيبتي وفجأة قلبتي و قولتيلي متصعش
أخرة صبري أنا جبته معاكي والصبر مينفعش

إقرأ المزيـــد

أنا سبت نفسي واخترتك

أنا سبت نفسي واخترتك
وحبيتك وقدرتك
وحتى قبل ما أشوفك
في قلبي وعقلي صورتك

بحبك ايوة حبيتك
وسبتك بس ما نسيتك
وبحمد ربنا أني
بعد العمر ده لاقيتك
تعالى في وشي واتملا
وابعد عني واتخلا
عمري ما هسألك أني
بمعنى الحب فكرتك

إقرأ المزيـــد

صغير ومحندق ويشيل تلاتة غير السواق

صغير ومحندق

ويشيل تلاتة غير السواق

مش كبير ومفندق

 وبيدخل من أي زقاق

يا توكتوك يا مدلع نفسك

محدش ف الزحمة ينافسك

والأجرة ارخص م التاكسي

في شبرا وعتبة ووراق

يا توكتوك يا بتاع الفقرا 

مانعينك تدخل للأوبرا

ألحقني دانا عندي بروفة

أنا كازانوفا وابن لشبرا

صغير ومحندق 

ويشيل تلاته غير السواق

أرض اللواء والمطرية 

وفي طنطا ووسط الشرقية

وف كل حتة بروح ألاقيك

على مستوى الجمهورية

هعملك على الفيس بوك جروب 

وكمان صورة ف وضع هروب

وأنتا بتهرب م الدورية

إقرأ المزيـــد

علو الآذان دقوا الجرس

علو الآذان دقوا الجرس 

وعلو صوتكو اللي انخرس

خالــــــــد شهيـد

أوعوا تخافوا من الحرس

لا يبقى حيوان مفترس

وطمعـــــــــه يزيد

لحد امتى يا بلد كل 

اللي جاي منك بنات 

ومفيش ولد

يقبل عشانك يتسجن 

أو حتى انه يتجلد

زى اللي مات

راضيين بكل الابتزاز وبيوت قزاز 

هتنكسر مع أول طوبة أو جرس

علوا الرؤؤس فوق الكتاف 

ماعاشي واحد لما خاف 

لكنه مات

وزير وظابط مع موظف مرتشي

فين الكبير اللي يقول عيب اختشي

دكتور وباع مهنته علشان مزاجه

نفس الغلط برضه المدرس جه وعاده

وإحنا الأهالي بنتخرس

نبكي الدموع على اللي راح وننكسر 

نقبل نطاطي ونقول يا رب ننتصر

وعمره ما هيجي انتصار

والوقت فات

العيب راكبنا من ساسنا لحد رأسنا

قابلين باي حد يجي وبرجله يدوسنا

مع أننا نقدر نفوق 

ونبقى فوق

كل الأمم

شدو الهمم 

وسيبوا بركان الغضب 

يرمي الحمم

يمكن تحرق اللي فينا سنين ظلم

يمكن يجينا في يوم واحد محترم 

يا خلق فوقوا بقى 

ده حسني هيبيع الهرم

إقرأ المزيـــد